«Моны без күрсәтергә тиеш түгелдер...»

Алмаз Мирзаянов һәм Зөлфирә Шәйдуллина узган елны никах укытып, туй уздырдылар. Баксаң, алар туй мәҗлесен өйләнешүләрен рәсми рәвештә теркәмәгән килеш кенә уздырганнар икән. Бу хакта Алмаз инстаграм битендә язды.

«Моны без күрсәтергә тиеш түгелдер инде бәлки. Шулай да куям әле. Бөтен парлар туй көнендәге «күчмә» теркәлүгә кадәр ЗАГСка барса, безнеке кеше төсле булмады. Һәм андыйлар бер без генә түгел. Туйга кадәр вакыт булмады, концертлар куеп йөреп, җиләк-җимеш, соклар аласы барлыгын да туйга бер көн кала искә төшердек. Туйдан соң да аның кайгысы булмады. Мин һәр иртәне Кыш Бабай булып эшләдем. Кичләрен район концертлары куйдык. Яңа елдан соң ялга бардык. Кайту белән эшкә чумдык. Аннары ЗАГСка таба юлны битлек-пирчәткә белән ябып куйдылар. Рәсми рәвештә ир белән хатын булмагач, ни талашып булмый ачу килгәндә. Җитәкләшеп, елмаеп йөрдек шунда. Ачу да килмәде бугай әле. Ниһаять, 17 июнь көнне законлы гаилә булдык. Оркестр да уйнамады, битлек аркылы үбешеп тә булмады. Шул битлек йөздәге шатлыкны да яшергән инде», – дип яза Алмаз.