Артур Исламов "Үзгәреш җиле" фестивален татар эстрадасының горурлыгы дип саный

«Үзгәреш җиле» – чит илләрдә күрсәтеп мактанырлык чын татар эстрада сәнгате фестивале. Бу фикерен Муса Җәлил исемендәге Татар академия опера һәм балет театры солисты Артур Исламов «Интертат» газетасына интервью вакытында әйтте.

Артур Исламов – Илһам Шакиров исемендәге Халыкара вокалистлар бәйгесе I премия лауреаты, Рәшит Ваһапов исемендәге яшь татар җыры башкаручылар бәйгесе һәм «Vissi d'arte» беренче халыкара бәйге лауреаты.

Җырчы сүзләре буенча, Европа илләрендә татар теленә ихтыяҗ бар. «Чит илдән килгән кеше: «Нинди җырларыгыз бар?» дип сораса, музыкаль дәрәҗәбез белән кызыксынса, «Мәгез, сезгә өч сезон, монда – югары класслы йөзгә якын җыр. Бу – чын татар әсәрләре», – диде ул.

«Үзгәреш җиле» татар музыкасына керткән өлеше белән тарихка кереп калачак һәм татар эстрадасының мирасы булып саналырга тиеш, дип исәпли Артур Исламов.

Текст һәм фото: Татар-информ