Бүреләр һәм сарыклар

Аллага шөкер, иске яңа елларны да уздырып җибәрдек, име? Чып-чынлап бер еллык итеп ашап куярга да өлгердек ‒ тын алуларына кадәр ешлады хәзер. Берочтан киемнәр тегелгән җөйләреннән шыгырдый башлады, күзләр кысыла төште... Шаяртам, әлбәттә. Әмма бәйрәм чоры, чыннан да, туклануны тулаем астын-өскә бутап аткан чор инде ул. Шуңа да бүгеннән, ел символына әверелүдән туктап, ашауны көйләп, күбрәк су эчеп, җәяү йөрүне арттырырга кирәк. Иң үтемле ысул ‒ чаңгыда йөрергә чыгарга кирәк, кар көрәү дә шәп иптәш булачак. Кая көрим мин аны, мин бит фатирда яшим диючеләргә ‒ ишегалдына чыгып, машинагыз торган дүрткә-дүрт квадрат метрны көрәгез! Бердән, фитнес, икенчедән ‒ көчкә өчкә эшләүче идарәче компанияләргә ярдәм итәрсез. Бүреләр дә тук, сарыклар да исән булачак.

Автор: Гөлнара Җәлилова