Илназ ‒ бик батыр егет

Мин үлеп теш табибларыннан куркам. Теге вжжжж итә торган котсыз машиналары гына да иң коточкыч төшкә керерлек зәхмәт. Бернинди анестезиясез теш яматтым, дигән кешеләр дә миңа бөтенләй фантастика жанры геройлары. Ничек инде ул теш табибы креслосына барып утырасың да, теләсә нәрсә эшлә, миңа барыбер, дисеңме инде?..

Миңа барыбер дигәннән... Шулай дип җырлаучы Илназ Гарипов та әнә шундый теш табибыннан курыкмаучылар исемлегеннән икән! Ие! Үзе шулай дип инстабитенә язып элгән. Алай гына да түгел ‒ анестезияне дә үзе ясый икән җырчы егет. Фотода нәкъ әнә шул укол шприцы белән дә Илназ ‒ авызын ачкан, уколын тоткан... Хәер, соңыннан уколын ташлап чыгып та качкан булырга мөмкин инде, әйеме? Менә анысы бөтенләй икенче тарих та булырга бик мөмкин ләса...

Автор: Гөлнара Җәлилова