Килмә, зинһар, чир

Бөтен җирдә грипп котыра ди бит. Мәктәпләрне дә шыпан-шыпан гына ябалар. Грипп ук димиләр үзе, ОРЗ дигән зерә шәп диагноз бар ич бездә. Вәт менә шул ОРЗ ‒ борын актыргыч, турыдан кырып бара. Әнә җырчы Дилә Нигъмәтуллинаның кызы Сафинә дә мәктәбен калдырып, өйдә утыра. Әпчи-төпчи килә башлаган, борын ага, күз ‒ яшьле. Ярый әнисенең әлегә өйдә көннәре ‒ аны кочаклап, тәмле мәмиләр генә ашап, җимеш сулары гына эчеп ята Сафинә. Болай булса, тиз арада үтеп тә китер әле ул салкын тиюләре.

Ә табиблар исә үз чиратында әлеге чорда сәламәтлеккә аеруча зур игътибарлы булуны сорый ‒ бүлмәләрне җилләтү, күбрәк саф һавада йөрү, күп кешеле җирләрне урап узарга. Һәм, әлбәттә, рационны витаминнарга бай продуктлар белән төзергә, цитрус, яшел салатлар ашарга куша.

Чирләмәгез, яме!

Автор: Гөлнара Җәлилова