Раяз Фасыйхов хатыныннан ник киткән

– Җырчылар турында халыкның иң белергә теләгән темасы гаилә инде аның. Раязны да беренче хатыныннан ник китте икән, диләр дә, Люциясен акыл белән сайлаган, дип тә җибәрәләр...

– Беренче хатын белән икебез дә бер үк төрле кызу, юл бирмәс булганга аерылыштык. Ә Люцияне нинди акыл белән сайлыйм ди мин? Мин аны күрүгә үлә-бетеп гашыйк булдым. Әйе, акыллы, җитди иде ул, затлы нәселдән икәне дә тәрбиясеннән күренеп тора иде. Шактый вакыт үземә каратырга тырышып йөрдем әле – эш буенча «Туган авылым»да еш күрешә идек. Аннан, өйләнешкәч – без пазллар төсле бер-беребезгә туры килгәнне аңладык. Ул миңа караганда зирәгрәк, акыллырак, төплерәк. Мин – балта, уңга-сулга шах-шох, ордым-бәрдемрәк кеше. Көнчеллегем дә юк түгел – хатыннан аз булса да битарафлык сизсәм, азрак шалтырата төсле тоелса – эчтән корт кимерә башлый. Люция минем кирәкле кнопкаларны белеп, кайвакыт җайлап, кайвакыт кемнәргәдер күзләрне ачарга мәҗбүр итеп, матур итеп тормыш алып бара. Ул гаиләдә шундый шартлар тудыра белә – минем һәрвакыт өйгә кайтасым килә.

Автор: Гөлнара Җәлилова

«Сәхнә», 2019 (№3)