Бөек «Җылак» артист Әзһәр Шакиров

Кичәнең алып баручылары – Татарстанның халык артисты Искәндәр Хәйруллин һәм Татарстанның атказанган артисты Фәннүр Мөхәммәтҗанов. Мөгаен, нәкъ шушы ике артист сайланганга күрә әлеге бәйрәм үтә дә җылы һәм матур узды. Ник дигәндә, бу тандем кичәнең буеннан-буена сценарий буенча да, импровизация дә өстәп, юмор катыш җитдилек аша бөегебез Әзһәр аганың тормыш һәм иҗат юлын тамашачыга җиткерделәр. Котларга килүчеләр дә аз түгел иде. Татарстан Дәүләт советы рәисе Фәрит Мөхәммәтшин Әзһәр Шакировка «Дуслык» Ордены тапшырды. Азнакай районы башкарма комитет җитәкчесенең социаль мәсьәләләр буенча урынбасары Д.Р.Гыйләҗев һәм «Азнакай йолдызлары» төркеме да котларга килгән иде. Мәшһүр Щепкинчылар Равил Шәрәфиев һәм Рабит Батулла да төркемдәшләрен котларга сәхнәгә күтәрелде. 

Юбиляр М.Гафури ис. Башкорт дәүләт академия театры, Уфа «Нур» татар дәүләт театры, К.Иванов ис. Чуваш Дәүләт академия драма театры, В.И.Качалов ис. Казан академия рус Зур драма театры котлауларын да кабул итте.  Чыгышлар Әзһәр ага уйнаган спектакльләрдән видеоөзекләр күрсәтү белән үрелеп барды. Ул төшкән фильмнардан өзекләрне дә күрү мөмкинлеге булды – артистны котларга «Татаркино» директоры Миләүшә Айтуганова да килгән иде. Кичәне җырлар белән Әсхәт Хисмәтов, Зәйнәп Фәрхетдинова, Раил Шәмсуаров бизәде. Ахырда Татар дәүләт җыр һәм бию ансамбле чыгышыннан соң Камал театры труппасы сәхнәгә чыкты. Әзһәр Шакиров килгән кунакларга һәм җитәкчелеккә рәхмәт сүзләре җиткерде.  

Таңсылу Мостафина