Анталиядә Татарстанга багышланган күргәзмә ачылды

Биредә татар авторларының сирәк китаплары, киемнәр һәм көнкүреш әйберләре тәкъдим ителгән.

Төркиядәге Анталия шәһәрендә быел 16 майдан эшләп килүче “Социалистик көнкүреш музее”нда Татарстанга багышланган күргәзмә тәкъдим ителде. Бу хакта Татарстан Республикасының Россия Федерациясендәге Даими вәкиллеге матбугат хезмәте хәбәр итә.

Татарстан Премьер-министры урынбасары - Татарстан Республикасының Россия Федерациясендәге Даими вәкиле Равил Әхмәтшин экспозицияне ачуда катнашкан. 

“Социалистик көнкүреш музее” директоры Рөстәм Вәлиәхмәтов кунакларга музейның ничек төзелүе турында сөйләде, ике катлы бина буйлап экскурсия уздырды.

Экспонатларны ул Казаннан алып килгән. Алар барысы да Татарстанның “Тузган торакны бетерү” проектын гамәлгә ашырганда җыелган экспонатлар.

Татарстанга багышланган бүлектә татар авторларының сирәк китаплары, киемнәр һәм көнкүреш әйберләре тәкъдим ителгән.

Равил Әхмәтшин музейга бүләк итеп Татарстан Республикасының Россия Федерациясендәге Даими вәкиллеге ярдәмендә чыгарылган китаплар, фильмнар, шулай ук Әлфия Авзалованың иҗатын саклау һәм үстерү фонды тарафыннан мәшһүр җырчының юбилеена чыгарылган материалларны тапшырды. Алар барысы да музейда үз урынын тапты, диелгән әлеге хәбәрдә.

Биредә шушы көннәрдә халыкара журналист һәм көнчыгышны өйрәнүче гарәпче Фәрит Сәйфел-Мөлековка багышланган экспозиция дә ачылган. Андагы материалларның бер өлешен шулай ук Равил Әхмәтшин тапшырган.

татар-информ

Фото: tatmsk.tatarstan.ru