Бер дигән ул үстергән!

Башкортстанның атказанган артисты Ришат Төхвәтуллинның Пирамида да узган юбилей концертында әнисе Розалия ханым да чыгыш ясады. «Карт бүре уласа, дөньялар имин була. Имин булсын дөньялар!» дип сүзен төгәлләп, җырга күчте ул. Бер дигән ул үстергән, гап-гади дә, шул ук вакытта затлы да ягымлы авыл апасы ул. Җырчының күп җырларын әнисе язган. «Кил, җаным», «Күзләрең», «Исеңдәме?» һ.б. җырларын атап үтәргә кирәк.

Әңгәмә вакытында да ипле генә Ришатның балачагы хакында сөйләп китте. «Абыйлар кунакка килсә, бездә бәйрәм була иде. Ришат абыйларның гармунда уйнаганын, җырлаганын йотлыгып тыңлый иде». «Карамалы-Гобәй»нең сүзләр авторы мин. Шигырьләрне күптәннән язам. Гомер буе авылда клуб мөдире булып эшләдем, гаиләбез белән клубта чыгышлар ясый идек», - дип әңгәмәсен дәвам итте ул.

Өч бала үстергән, җырга-моңга гашыйк ханымга алга таба да сәламәтлек, балаларының игелекләрен күреп, куанып яшәргә язсын дигән теләктә калабыз.