Булат Бәйрәмов: «Фатирга акча җыя башла»

Әти-әни үз баласына һәрвакыт булдыра алганча ярдәм итәргә омтыла, беркайчан да бернигә дә мохтаҗ булмасыннар дип тырыша.

Популяр җырчы Ләйсән Гыймаева белән алып баручы Булат Бәйрәмовның уртанчы кызлары күптән түгел туган көнен билгеләп үтте. Шул уңайдан әтисе белән әнисе Зифага нәрсә бүләк итәргә икән дип баш вата. Мәктәп формасы, портфель, пенал, шәхси үтүк... Башка вариантлар калмагач ир белән хатынның әңгәмәсен кызлары бүлдерә. «Әти-әни, борчылмагыз, мин үземә бүләккә Айпад алдым инде», – дип белдерә Зифа. «Нинди акчага алдың соң син аны?» – дип гаҗәпләнә әти кеше. «11 ел буена тиенләп җыйдым да алдым», – дип җаваплый кызчык.

Кызларының мөстәкыйльлегенә шатланган Булат Бәйрәмовның башына шулчакны тагын бер гениаль фикер килә, кызларына шулай әз-әзләп фатирга да акча җыя башларга кинәш итә ул. Ә без исә Зифаны тагын бер кат туган көне белән котлыйбыз һәм уңышлар теләп калабыз!