Камал театры артисты Әзһәр Шакиров сәләтле балалар белән очрашуда булды

Кичә, 22 гыйнвар көнне Казанның «Аерым предметлар тирәнтен өйрәнелә торган 171 нче урта гомуми белем бирү мәктәбе»ндә «Сәхнә» журналы Г.Камал исемендә Татар дәүләт Академия театры белән берлектә сәләтле балалар белән иҗади очрашу оештырды.

«Сәхнә» журналы хезмәткәрләре балаларны сәхнә, театр сәнгате белән якыннан таныштыру нияте белән шушындый җылы иҗади очрашуларны традицион рәвештә ай саен оештыра. Бу юлы очрашуның махсус кунагы буларак Г.Камал театры актёры, Россиянең һәм Татарстанның халык артисты Әзһәр Шакиров чыгыш ясады. Биредә артист үз тормышыннан куңелле хатирәләр белән уртаклашты, балаларның сорауларына җавап бирде. Олпат артистыбыз балаларга театр сәнгатенең төп бурычын халыкка, үз милләтеңә карата хөрмәт тәрбияләү дип аңлатты:

«Үзенең телен, милләтен саклаган кеше әшәке булмый. Сез бернинди милләттән ким түгел, шушы рух сезнең күңелләрдә һәрвакыт калырга тиеш!» – дип сүзен йомгаклады ул.

Балалар очрашуга матур чыгышлар әзерләгәннәр, мәктәпнең иҗат түгәрәкләре кунакларга җырлар, биюләр тәкъдим итте. Татарстанның атказанган артисты Фердинанд Хафизов җитәкчелегендә эшләп килүче мәктәпнең театр түгәрәге театраль күренеш белән сөендерде.