Камал театрының Шәрык залында беренче премьера - «Мең дә бер кичә»

Фәрит Бикчәнтәев җыйган төркем быел соңгы курста укый. Берничә атна элек «Төркем тулы составта театр штатына алыначак» дигән сүз чыккан иде. Бу фикерне аңларга була – театрның яңа бинасында 4 зал, аларның барысын да тамашачылар белән тутыру беренче урында, ә моның өчен штатта җитәрлек санда артистлар булуы да мөһим. 

Быел 4 нче курсны тәмамлаучы студентлар «Мең дә бер кичә» спектаклен тәкъдим итте. Әсәрдә сурәтләнгән вакыйгалар, әкиятләр матур һәм оригиналь рәвештә сәхнәгә күчкән. 2 сәгатькә якын вакыт эчендә тамашачылар гарәп әкиятләре дөньясына чумды. Түгәрәк сәхнә идәннән аз гына күтәрелеп тора, шуңа вакыт-вакыт тамашачылар үзләрен спектакльнең бер өлеше итеп тоя башлады сыман. Моңа студентларның зал белән интерактив уздырулары да (тамашачыларга тавыш бирү кәгазьләре тарату, «серле ингридиент»ны залдан табу һ.б.) ярдәм итте. Шулай ук залга керү ишекләренең берничә булуы һәм спектакль барышында уйнаучыларның шул ишекләр аша йөреп сәхнә алмашынуны белгертүләре дә кызыклы алым булды. Иң башта сәхнә уртасында торган куе кызыл япма астында кемдер бар дип башка да килмәде, шул сәбәпле әлеге япма астыннан бер-бер артлы артистлар чыга башлагач шаккатып, сискәнеп тә куясың. Түгәрәк сәхнәнең төрле якларында реквизитлар ята һәм алар әкренләп спектакльдә «катнаша» башлый. Реквизит кына түгел, теге яки бу сәхнә булуга карап, төрле төсләр белән янучы идән дә үзенә күрә декорациянең бер өлешенә әверелде. 

Студентларга зур, җаваплы эш йөкләнгән һәм алар ул эшне югары дәрәҗәдә башкарып чыкты. Олылар өчен куелган бу әкият тамашачылар күңеленә хуш килер дә, аның гомере озын булыр дип ышанасы килә, чөнки «Мең дә бер кичә» моңа лаек! 

Режиссёр – Данна Афаунова

Гарәп халык әкиятләре буенча рус теленә тәрҗемә - М. Салье, татар теленә тәрҗемә - И. Мөхәммәтгалиев.