Кариев театрының яңа йөзе!

Бүген Татар-Информ матбугат агентлыгында Г.Кариев исемендәге яшь тамашачы театрына яңа логотип сайлау бәйгесенең нәтиҗәләре ясалды. Конкурсның икенче этабында сайлап алынган 18 эшнең өчесе финалга, социаль челтәрләрдә ачык тавыш бирүгә тәкъдим ителде.

Финалга чыккан өч эшнең икесен Фешин исемендәге Казан рәсем сәнгате училищесы студентлары Ангелина Филимонова һәм Айгөл Гыйльметдинова тәкъдим иткән. Берсенең авторы – танылган татар дизайнеры Илдар Әюпов.

Шул рәвешле, Кариев театрының яңа йөзен Ангелина Филимонова әзерләгән эскизлар тәкъдим итәчәк. «Кариев театрының исеме «К» хәрефеннән башланганга «К» хәрефен нигез итеп алдым. Логотиптагы түгәрәк театр залында русларны һәм татарларны, шулай ук яшьләрне һәм өлкәннәрне берләштерүне символлаштыра», – дип сөйләде җиңүче, Фешин исемендәге Казан рәсем сәнгате училищесы студенты Ангелина Филимонова.

Театрның яңача бизәлеше белән тамашачылар 22 декабрь көнне Г.Кариев театрының юбилей кичәсендә якынрак таныша алачак.

Язманың авторы һәм фото: А.Габдуллина