Казан янында мөселманнар һәм христианнар өчен яңа зират ачылачак

(Казан, 15 март, «Татар-информ»). Быелның җәендә Татарстан башкаласында яңа зират ачылачак, диелә Казан Башкарма комитетының документлар җыентыгында.

86 гектар мәйданны биләгән территориядә мөселманнарны да, христианнарны да җирләү өчен участоклар булачак. Яңа зират барлыгы 148,5 мең урынга исәпләнгән.

Зиратка бүленгән участок шәһәрдән чыгу юлында, М7 трассасы артында, Питрәч районының Званка авылы янында урнашкан.

Яңа зиратка бюджеттан 265,4 миллион сум акча бүлеп биреләчәк. Бюджеттан тыш бүленгән акчаларга биредә мәчет һәм часовня төзү күздә тотыла.

Хәзерге вакытта Казандагы 33 муниципаль зиратның гомуми мәйданы 320,2 гектар тәшкил итә.  

татар-информ