Казанда Әлмәт театры гастрольләре узачак

Бүген «Татар-информ» мәгълүмат агентлыгында Әлмәт татар дәүләт театрының Казанда узачак гастрольләренә багышланган матбугат конференциясе узды. Журналистлар алдында театрның директоры Фәридә Исмәгыйлева, режиссёр Ильяс Гәрәев һәм театрның алдынгы артистлары Динар Хөснетдинов белән Мәдинә Гайнуллина чыгыш ясады.

Театр Г.Камал исемендәге Татар дәүләт Академия театрында узачак гастрольләре вакытында Казан тамашачысына 14 – 17 февраль көннәрендә барлыгы 7 спектакль тәкъдим итәчәк. Әлмәт театры гастрольләре Ф.Борнашның «Яшь йөрәкләр» спектакле белән ачылып, театрның традициясенә әверелгән гастрольләрне йомгаклау концерты белән тәмамланачак.

Гастрольләр афишасында Әлмәт театрының иң уңышлы премьераларын («Медея», «Тынлыкта гына урын бар», «Хыял йорты», «Әҗәлгә дару бар диләр», «Мең дә беренче кичә») күреп булачак.

Текст һәм фото: А.Габдуллина