«Күпме күз яшьләре түгелде, сәламәтлек бетте...»

«Болгар кызлары» солисткасы Айгөл Зәйнуллина инде күптән балаларының әтисе Тимур Шәфигуллин белән катлаулы мөнәсәбәтләрдә. 2 елга сузылган тавыш-гаугадан соң бүген янә гаилә әгъзалары суд каршына басты.

«Бүген балаларымның әтисе Шәрифуллин Т.И.ның ата-аналар хокукларын хәл итү эше буенча суд утырышы уза. Күпләр гаиләбездәге бу хәлләр тәмамландымы инде, дип кызыксына. Кызганычка каршы, әлеге сугыш инде ике ел дәвам итә! Һаман судлар, гаризалар, адвокатлар, полиция хезмәткәрләре... Закон буенча мин олы улымны судка сорау алуга алып барырга тиеш. Әлбәттә, суд утырышында катнашу улым өчен зур травма булачак, ничек кенә тырышсам да, бу сынаудан аны саклап кала алмадым. Башкача психолог экспертизасы өчен дүртебезгә 64 мең акча кирәк булыр иде, әмма хәзерге вакытта минем андый матди мөмкинлегем юк. Аталарының намусында калсын. Бары тик ул гына балалары турында уйламыйча, бер сәбәпсезгә үз гаиләсенә каршы сугыш башлады!

Хәзер инде мин дөреслеккә ышанмыйм. Әмма ихлас күңелемнән судның дөрес карар кабул итүенә ышанам. Күпме күз яшьләре түгелде, сәламәтлек бетте... Балаларның какшаган эмоциональ халәте һәм адвокатларга түгелгән акчалар...

Юк! Мин мондый кешегә балаларымны ышанып тапшырмыйм! Дөреслек безнең яклы булганчы үзем һәм балаларым өчен көрәшәчәкмен!

Шушы вакыт эчендә ул бер тапкыр да килеп, үзенең кылган гамәлләре өчен минем алда һәм балалары алдында гафу үтенмәде. Аңа балалар кирәкми, ул алар өчен җаваплылык тотмый, бары тик суд барышында матур сөйли генә белә.

Бу хәлләр тизрәк тәмамланып, ул кеше безне рәнҗеткәне өчен үз җәзасын алсын иде! Аллаһы Тәгалә һәм балалары алдында җавап тотсын иде», – дип ачынып яза Айгөл.

Әлеге вакытта Айгөлдән хәбәр юк. Кем белә, бәлки бүген алар бу ситуциягә нокта куярлар?