«Нигә син алай кешене аерасың?»

Популяр артист Рамил Шәрәповның иҗади тормышында шатлыклы вакыйга – тәүге концерты булачак. Бу хакта пародия һәм юмор остасы үзенең Инстаграм тасмасында хәбәр итте. 8 апрельгә планлаштырылган тамаша бөтен дөньяны чолгап алган коронавирус вәзгыяте нәтиҗәсендә 30 апрельгә күчерелә.

Шул уңайдан артист тамашачыларын тынычландырырга тырышып, коронавирус турында җыр башкара:

«Кайгырмагыз, шикләнмәгез,

Вирус безгә килми ул.

Курыкмагыз, туганнарым,

Мишәрләргә тими ул!», – ди, «Аерылмагыз» җырын көйләп.

Шараповның шаяртуын аңламаучылар да табылган. Комментарийларда Рамилнең җырына каршы «Чиста татарларга тия мени? Нигә син алай кешене аерасың? Синең концертка мишәрләр генә йөрми», – дип канәгатьсезлек белдерә бер тамашачы. Артист исә, бу сүзләргә җавап итеп, шаяруны аңларга кирәклеген генә искәртә.

Шаярып, елмаеп һәм көлеп яшәгәндә генә барлык авырлыкларны җиңеп чыгарга мөмкин. Сәламәт булыйк, дуслар!