Ришат Төхвәтуллин: «Кыйнап ташламадылармы икән, дип борчылдык»

Бу көннәрдә Ришат Төхвәтуллинның тавыш операторы югалган икән дигән хәбәр күңелләрдә борчу уятты. Чит шәһәрдә, кая китәргә мөмкин инде ул. Ришат үзе дә борчылды, язылучыларына, тамашачыларына мөрәҗәгать итте. Күп кеше җырчының конкурентлары эшләгән бу эшне дип уйладылар, янәсе Ришатның концертларын булдырмаска тырышалар. Кичә Артурның табылуы ачыкланды.

«Артур дигән тавыш операторыбыз табылды, ниһаять. Питер шәһәренә барып җиткән. Концертыбыз башланырга ике сәгать кала без аны югалткан идек. Берәр проблемасы килеп чыккандыр, дип уйладык. Әле ярый безнең егетләр профессионаллар. Нәркис дигән егетебезне звукка утырттык. Артурны ике көн эзләдек, полициягә дә мөрәҗәгать иттек. Бөтен җиргә хәбәр бирдек, телевидениегә дә. Бу егет үзе элемтәгә чыкты. Питерга барып җиткән. Минем белән сөйләшмәде, биюче егетебезгә генә киемнәрен җибәрүен сорап шалтырткан. Бу хәл аның белән инде беренче тапкыр гына булмаган. Дуслары безгә яздылар, имтиханнар вакытында да ул аларны уңайсыз хәлдә калдырган булган. Ул безнең пультның настройкаларын бетергән дә, нишләргә белмичә чыккан да киткән. Иң мөһиме исән-саумы икән дип борчылган идек, чөнки хезмәт хакы алган вакыт иде. Кыйнап ташламадылармы икән, дип борчылдык. Иң мөһиме исән-сау икән. Кадерле тамашачым, сезне борчыган өчен гафу итегез. Безнең белән бергә булдыгыз, рәхмәт сезгә», дип сөйли Ришат.

Автор: Г.Шарапова

Фото: rishat_thv