“Шаян-ТВ” татар балалар телеканалы 1 февральдән эшли башлаячак

(Казан, 24 гыйнвар, “Татар-информ”, Гөлнар Гарифуллина). “Шаян-ТВ” балалар телеканалы февраль аеннан эшли башлаячак. Бу хакта “Татар-информ” хәбәрчесенә “Яңа гасыр” телерадикомпаниясе генераль директоры урынбасары Данил Гыйниятов һәм хәбәр итте.

“Без сынау режимында каналны февральдән эшләтеп җибәрәбез. Баштагы чорда яртышар сәгатьләп. Тапшырулар “ТНВ-Татарстан” һәм “ТНВ-Планета” каналлары сеткасында булачак”, - диде ул.

Телеканалның баш редакторы – Балалар һәм яшьләр иҗат берләшмәсе җитәкчесе, педагогика фәннәре кандидаты, Татарстанның атказанган мәдәният хезмәткәре Рамилә Сәхабетдинова. Ул "Татар-информ" хәбәрчесенә “Шаян ТВ”ның 3 яшьтән 15 яшькә кадәрге татар телле балалар өчен күздә тотылуын әйтте. Рамилә Сәхабетдинова әйтүенчә, бу атнада җомга көнне телеканалның нинди булачагы хакында матбугат очрашуында тулырак белеп булачак. Чара М.Горький урамы, 15 нче йортта уздырыла. Телеканалның студиясе дә шунда урнашачак.

“Тапшырулар “ТНВ-Татарстан”да 15.00 дә, “ТНВ-Планета”да 15.15 тә булачак. Президентыбыз хәер-фатихасын бирде: алга таба бу канал 24 сәгать дәвамында татар телендә генә булачак. Президент ничек әйтсә, шулай - 1 февральдән эшли башлаячакбыз. Татар телендә мультфильмнар, тапшырулар, балалар тормышын яктыртучы кызыклы тапшырулар күрсәтеләчәк. Проблема юк, кадрларыбыз күп, татар телендә сөйләшә торган сәләтле балалар, яшүсмерләр, яшьләр җитәрлек, теләүчеләр күп”, - дип белдерде Рамилә Сәхабетдинова.

татар-информ