Татар һәм башкорт альтернатив музыкантлары Уфада "Ак калфак" җырын бергә башкарды

(Казан, 21 май, "Татар-информ"). Кичә, 20 майда, Уфаның Music Hall клубында «Ике кала» акустик концерты татар һәм башкорт альтернатив музыкасы сөючеләрен җыйды. Сәхнә хуҗалары - "Бүреләр" төркеменә кунакка Казаннан Зәринә Вилданова һәм "Чикләвек" төркеме килде. Бу хакта Yummy Music лейблы җитәкчесе Ильяс Гафаров хәбәр итә.

Моңарчы Казан тамашачысы "Бүреләр" төркемен 26нчы апрельдә «Мин татарча сөйләшәм» фестивалендә күрә алган иде.

Концертның иң кайнар ноктасында "Бүреләр" төркеме янына Зәринә Вилданова чыкты һәм алар, бергәләшеп, татар халык җыры "Ак калфак"ны башкардылар. "Чикләвек" төркеме исә, татар халык һәм ретро җырларын заманча көйләнештә башкарып, башкорт яшьләрен таң калдырды.