Тирән кайгы: Роберт Миңнуллин вафат

Бүген Татарстанның халык шагыйре Роберт Миңнуллин 72 яшендә вафат булды. Бу хакта аның кызы Таңсылу инстаграм аша хәбәр итте. 

Соңгы елларда шагыйрь яман чир белән көрәшкәне билгеле. 

Роберт Миңнуллин 1948 елның 1 августында Башкортстанның Илеш районында туган. Озак еллар ул «Яшь ленинчы» газетасын җитәкли (соңрак – «Сабантуй»). 1988 елдан 1994 елга кадәр Татарстан балалар фонды рәисе, 1995-2014 елларда ТР Дәүләт Советы депутаты булып эшли.

«Сәхнә» журналының редакциясе гаиләсенең тирән кайгысы белән утраклаша. Туганнарына көч һәм сабырлык телибез.