Илһам Шакиров тууга 90 ел

Илһам абый белән без студент вакыттан ук таныш идек. Энесе Хәйдәр (язучы Хәйдәр) белән еш кына аның «кольцо»дагы фатирында булырга туры килде. Әле дә хәтерлим, ул йортының өстендә «Аэрофлот самолетлары белән очыгыз» дигән зур язу тора иде. Аның янәшәсендә хәзер энергетиклар бинасы.

Аңа кадәр дә якыннан күрешкән бар иде Илһам абый белән: туган авылы Яңа бүләктә. Ул чакта Сарман районының «Игенче колхозы иде, хуҗалык җитәкчесе булып утыз ел буе әнинең абыйсы Шамил абый Гыймадиев торды. Шамил абый данлыклы колхоз рәисе иде. Илһам абыйның төп нигезе белән колхоз җитәкчесенең йортлары кара-каршы гына, даһи җырчы белән берничә мәртәбә Яңа бүләктә бергә туры килдек. Ул чакта төп йортта Кыям абый Шакиров гаиләсе яши иде. Сүз уңаеннан әйтим, Кыям абый абый үзе дә энесе кебек бик матур җырлый иде, тик үзе әйтмешли,  энекәшкә җитеп булмас, ди торган иде. Илһам абый Шамил абыйны хөрмәт итә, алар бик дуслар иде.

Илһам абый хакында күп язылды һәм языла. Чөнки андый җырчыны гасырлар гына тудыра. Андый бөек бу яңа гасырда тагын булырмы ул, юкмы – билгесез. Шуңа күрә, янында булып кайтканнан соң, күңел нечкәреп китеп, мин кайбер хатирәләр белән генә уртаклашмакчы булам. Яңа бүләккә әле дә кайтып йөрим, анда абыйның кызы, малайлары еш була, хатыны Сания апа яшәп ята. Дания апа да, Дамир да, Рамил белән Илдар да Илһам абый башларыннан сыйпап үстергән малайлар, кызлар. Дания апа озак еллар Чаллыдагы атаклы татар гимназиясенең директоры булып эшләде, Дамир «Сельхозтехника» җитәкчесе, эшмәкәр, Рамил шулай ук Чаллы ягында хөрмәтле кеше, Илдар Гыймадиев исә Татарстан Дәүләт Советы депутаты, агрохолодинг генераль директоры.

Илһам абый миңа «Диннур» ди торган иде, ул якларда «з» хәрәфен әйтеп мәшәкатьләнеп тормыйлар. Әйткәнемчә, мин ул чактан ук аның җырчы буларак даһилыгына соклансам, икенчедән, Илһам абый бик эрудит шәхес! Дөресен әйтим, бу җырчылар арасында сирәк була торган хәл. Ә ул гаҗәеп тапкыр һәм бик гыйлемле кеше! Өстәвенә кеше буларак бик гади дә. Туган авылы Яңа бүләкне бик ярата ул. Аңа анда йөр-яңа йорт та салып куйдылар, хәзер ул Илһам Шакиров йорт-музее.