«Кеше турында язасыз, үзегез фәрештәдер!»

Татарстанның һәм Башкортстанның атказанган артисты Ришат Төхвәтуллин белән элеккеге продюсеры Рифат Фәттахов арасында булган аңлашылмаучанлыклар турында күп язылды. Зур гауга белән иҗади тандем таркалып, Ришатка Фәттахов продюсерлыгы астында иҗат ителгән җырларын башкару да тыелган иде. Ике арада сөйләшүләр алып барылу нәтиҗәсендә, «дуслык җепләре» яңартылды һәм Ришат бу мәсьәләгә нокта куйды.

Ә күптән түгел Ришатны «дуслык уены» уйнауда гаепләп, газетада шактый күңелсез эчтәлекле мәкалә дөнья күргән. Бу мәкаләне Ришат үзенең Инстаграм сәхифәсенә урнаштырып, авторга мөрәҗәгать итә.

«Мин сезне, гафу итегез, белмим, әмма сез мине бик яхшы беләсез бугай! Кеше турында язасыз, үзегез фәрештәдер!

<...>

...Һәм шундый «шәп» мужик икәнсең, ни өчен гәзиткә басып чыгарып мине хурларга? Бу халыктан ярдәм көтүме, ягъни мине мыскыл итеп басмалар чыгарып тамашачылар санын киметүме максатыгыз? Мәгънәсен аңламыйм. Гомумән, бук куңелле кешеләрне яратмыйм!» ‒ дип яза җырчы.

Комментарийларда коллегалары Ришатны тынычландырырга тырыша. «Борчылма, брат. Чүп сүзгә игътибар итмә!» ‒ дип яза Әбри Хәбриев. Шулай ук «Үз тормышларын уңышлы ясый алмаганга күрә бәйләнәләр, Ришат. Андыйлар гомер буе бәхетсез яшиләр, кызганыч, андыйларны үзгәртеп тә булмый...» ‒ дип өстәгән Илназ Сафиуллин.