«Кызганыч, бу чынбарлык»

Коронавирус авыруы хакында халык арасында күптән имеш-мимешләр йөри. Соңгы арада көз көне  янә үзизоляция башланачак дигән сүз тарала башлады. Илсөя Бәдретдинова да бу хакта үз фикерен белдерде.

«Борын-борын заманда концерт дигән нәрсәләр булган икән. Анда кешеләр очрашканнар, ди, имеш. Кочаклашып күрешкәннәр, жырлашканнар, күңел ачканнар. Хәттә кайвакыт бер кашыктан бәлеш тә ашаганнар икән дип сөйлиләр...Ә концерт дигән нәрсәдән соң барысы бергә җыелышып фотога төшә торган булганнар.

Ә аннары... Ә аннары ниндидер вирус дигән явыз килеп чыккан! Барлык кешеләрнең дә авызларын томалаган. Хәтта өйләренә куып ябып куйган. Кайберәүләрне үзе белән алып киткән. Күзгә күренмәгән, ләкин бик куркыныч булган.

Соңрак кешеләр ияләшкәннәр. Урамнарга чыкканнар, яңадан яшәргә өйрәнә башлаганнар. Ләкин көзгә керү белән тагын бер нәрсә килеп чыккан. Ул «нәрсә»  турында күп язарга ярамый! Шул нәрсә үтмичә, дәвамын язып булмый...» – дип яза Илсөя Бәдретдинова инстаграм битендә.

Инстачылар аның фикере белән килештеләр, һәм әкият иҗат итәргә киңәш иттеләр.

«Сезгә балалар өчен әкиятләр яза башларга кирәк!»;

«Әле бу уртасы гына... Менә хәзер Турцияләрдә ял итүче бәндәләр тагын берәр нәрсә ияртеп кайта башласа, була дәвамы»;

«Чыкмасын инде берүк, җитәр. Исән-сау эшләп, концертларга йөреп, ял итеп, бергә-бергә яшәргә язсын»;

«Бу замананың бер зур тарихы, иптәшләр. Кызганыч, бу чынбарлык», дип фикерен җиткерәләр укучылар.