Җәмәгать транспортында йөрү бәясе 32 сумга кадәр күтәрелергә мөмкин

Казанның җәмәгать транспорты оешмасы вәкилләре проезд бәясен 7 сумга арттыруны сорый. Хәзерге бәяләр буенча җәмәгать транспортында йөрү 25 сум булса, АТП җитәкчеләре аны 32 сумга кадәр күтәрүне таләп итә. «Әгәр дә бәяләр күтәрелмәсә, автобуслар йөрүдән туктый», – дип хәбәр итә алар «Реальное время» мәгълүмат агентлыгына.

Моның төп сәбәпләре:

- 2015 елда дизель ягулыгының бер литры 32,75 сум булса, бүгенге көндә исә ул АТП оешмаларына 42,80 сумга төшә.

- Россиядә җитештерелгән тәгәрмәч бәяләре соңгы өч ел эчендә 9 меңнән 14 меңгә кадәр арткан. «Иң киме 2 ай саен тәгәрмәчләрне алыштырырга кирәк», – дип сөйләгән 11 һәм 43 маршрутларны тәэмин итүче ООО«Байлык №3» оешмасы җитәкчесе, Дәүләт советы депутаты Руслан Йосыпов.

- Руслан Йосыпов сүзләренчә, җәмәгать транспортына кирәкле запчасть бәяләре дә доллар курсына бәйле үзгәреп тора.

- Шулай ук электрон кошелек һәм социаль түләү ысулларының АТП оешмаларына артык кыйммәткә төшүе искәртелә. Соңгы еллар белән чагыштырганда, «проездной билет» белән кулланучыларның саны бермә-бер арткан.

Бәяләр кышка кадәр күтәрелмәсә, маршрут автобусларының күбесе рейсларга чыга алмаячак, дип хәбәр итә җәмәгать транспорты җитәкчеләре.

Алсу Габдуллина

Фото www.kazan-patp2.ru сайтыннан алынды