Ләйсән Мәхмүтова: «Кайбер кешене укып шаккатам»

«Зөләйха күзләрен ача» сериалы татар вәкилләре арасында төрле фикерләр тудырды. Татарстанның атказанган артисты Ләйсән Мәхмүтова бу хакта үз фикерен белдерде.

«Күп сорадылар, язарга булдым! Бу сериалны бик көттем, чөнки, беренчедән, бу әсәр бик резонанслы булды, (кызганычка каршы, әле үзем укымадым, китабы кызыграк дисәләр дә, карыйсы килде); икенчедән, узебезнең Татарстан артистлары да төшкәч, күрәсе килде. Артист буларак мин бу сериалны бүтән күзлектән карыйм. Кем уйный, ничек уйный, төшерү сыйфаты, кием...

Бик күп ямьсез комментарийлар укыдым. Кайберләр, гомумән, каргышлар ташлап яза. Язучыны да, куючуны да, уйнаган артистларны да  каргыйлар. Кайбер кешене укып шаклар катам, дәлилләре урманнан чыккан кешеләрнеке кебек, бик караңгы һәм сай, эшкә туры килми. «Хурлый башлагач, мин дә пычырак ыргытыйм әле», – дип язучылар да бар, бездә яраталар бит алай итәргә.

Әйе, сериалда бар да дөреслеккә туры килми, «ляп»лар да бар... Ләкин авыз ачып, татарларны мәсхәрә итәләр, юкка чыгаралар, дип кычкырган кешеләрне гомумән аңламыйм!» – дип яза артистка.

Җырчының укучылары әлеге фикерне хупладылар: «Китабын бер сулышта укыган идем, киносын да бер сулышта карадым. Шуны аңламыйм, ни өчен кайберәүләр татар халкын начар яктан күрсәтә бу әсәр дигән фикердә? Илдәге бар халыклар шикелле ук репрессия корбаны булган милләттәшләребез күпме газап чиккән, күпме авырлык кичергән... Бу китап шул турыда тугелме соң?»; «Татар халкы кимсетелгән димәс идем мин. Анда бит татарлар гына түгел. Зөләйханың бер кире ягын да күрмәдем, күпме авырлыклар күреп яшәгән, соңыннан да бирешмәде, ныклы булды».