Зөлфирә Шәйдуллинадан тишекле коймак рецепты

Зөлфирә Шәйдуллина үзенең иң яраткан тишекле калын коймак рецепты турында сөйләде. Рецептны Сегә дә тәкъдим итәбез.

Камыр өчен кирәк булачак:

• 1,5 стакан иләнгән он;
• 3 кашык сыек май;
• 3 йомырка;
• 2 аш кашыгы шикәр комы;
• 1 чәй калагы тоз;
• 0,5 чәй калагы сода;
• ярты стакан кап-кайнар су (юкарак кирәк булса, күбрәк);
• 1 савыт катык.

«Катыкны суыткычтан алдан алып куегыз, салкын булмасын. Коры савытка катыкны, 3 йомырканы ватып саласыз, яхшылап туглыйсыз. Шикәр комын, тозны салып болгатасыз. Шуннан он салып болгатасыз, аннан соң май, кап-кайнар су саласыз да, кабат яхшылап болгатасыз. Әзер булгач, сода саласыз һәм янә болгатасыз.

Табаны алдан ук кыздырып куярга кирәк. Бераз май белән сөртеп алабыз да, кыздырабыз. Аш бүлә торган чүмеч белән коймагыбызны кызган табага тигез итеп җәябез. Коймакның өсте тишекләнеп бетә, агы калырга тиеш түгел! Икенче якка шалт итеп әйләндереп куясыз да, 1 минут чамасы тотасыз ( бәлки әзрәк тә вакыт кирәк булыр). Матур тәлинкәгезгә тезеп барасыз, әле һәрберсен сыер мае белән майлап та барсагыз – тагын да тәмлерәк була!», – дип яза Зөлфирә инстаграм сәхифәсендә. 

Фото: @zulfira_shaydullina