Милли бәйрәм! Тел бәйрәме!

Февраль аенда Казанның 175 нче санлы гимназиясендә күренекле язучы, халык шагыйре Равил Фәйзуллин белән иҗади очрашу узды. Безнең редакция дә чакырылган иде. Шуңа күрә әлеге матур чараны үз күзләрем белән күрү бәхетенә ирештем.

Равил ага залга кергәч тә аны алкышлап каршыладылар. Хөрмәтле шагыйребез сәхнәгә менгәнче башта залда урын алды, чөнки укучылар затлы һәм үтә дә эчтәлекле концерт программасы әзерләгән иде. Алып баручылар, номерлар белән чыгыш ясаучылар – барысы да балалар, укытучылар үзләренең эш нәтиҗәсенә сокланып, шулай ук залдан гына күзәтте. Бу аларның үз укучыларына ышаныч белдерүләре һәм балаларның җитәрлек дәрәҗәдә мөстәкыйль булуларын күрсәтте. “Кечкенә дә – төш кенә” дигәндәй, концерт бик озын булмаса да (Равил ага белән турыдан-туры әңгәмә коруга күбрәк вакыт калдыру исәбе белән), эчтәлек ягыннан күләмле һәм яхшы программа әзерләнгән иде. Очрашу барышында туган тел, сүз сәнгате матурлыгына игътибар югары дәрәҗәдә булуы сокландырды. Моның өчен мөгаллимнәргә аерым рәхмәт! Шигъри чыгышлар шагыйрьнең тормыш юлы, андагы кызыклы фактларны барлау белән үрелеп барды. Катнашучылар исемлегендә башлангыч сыйныф укучылары да, югарырак сыйныфта укучы балалар да бар иде. Чыгышлар тәмамлангач, Равил ага сәхнәгә күтәрелде. Үзе дә тормышында булган истәлекле вакыйгалар белән уртаклашты. Үз юлыңны, һөнәреңне ничек сайларга, кыйбладан ничек тайпылмаска һәм башка күп темаларга үзенең тормыш тәҗрибәсеннән чыгып киңәшләр бирде. Залдан яңгыраган төрледән-төрле сорауларга Равил Фәйзуллиннан кызыклы, урыны белән хәтта юморлы җаваплар кайта торды.

“Сезнең арада да шигырь язарга яратучылар бардыр. Миңа бүген бик күңелле булды. Бик тансык булды бу очрашу. Мондагы затлылыкка исең китә! Сорауларыгыз, кызыксынуыгыз өчен балаларга, укытучыларга бик зур рәхмәт! Без бүген бер-беребезгә үзгә бер бәйрәм ясадык шикелле. Милли бәйрәм! Тел бәйрәме!” сүзләре белән Равил ага очрашуның рәсми өлешен тәмамлады. Аннан соң директор Абдулвахобов Камил Рөстәм улы шагыйрьгә гимназия буйлап экскурсия үткәрде. Ахырда Равил Фәйзуллин үзенең берничә китабын гимназия китапханәсенә бүләк итү нур өстенә нур булды!