Сәнгать алиһәләрен берләштерүче фестиваль

Тамашаның икенче исеме - «Объединяя музы», ягъни фестивальдә сәнгатьнең төрле өлкәләренә игътибар бирелеп, полистилистик концертлар тәкъдим ителәчәк. 12,16,21 декабрь концертлары ТР С.Сәйдәшев исемендәге Зур концертлар залында, ә 14 декабрьдә концерт ТР Милли музеенда узачак. Тамашачы хореография номерларын (Казан хореография училищесы), комнан рәсем ясау сәнгатен күзәтә алачак (Е.Ермолина), ЗКЗ фойесында Казан рәссамы Татьяна Лярсон күргәзмәсе оештырылачак, музейда үтәчәк концертта исә аерым экспонатларга багышланган композицияләрне ишетергә булачак. Фестивальдә аерым бер сәнгать өлкәсенең төрле жанрлары берләшүе дә күз уңында тотыла. Беренче концертта аккордион, банденеон һәм татар гармуны яңгырашларын чагыштырып булачак. Классик музыка джаз, рок, этно форматларында тәкъдим ителәчәк, хәтта «Битлз» музыкасын борокко стиле яңгырашында ишетеп булачак, дигән вәгъдәләр фестиваль алды интригасын көчәйтә.
Фестивальдә катнашучылар арасында Петербург (А.Метенев), Мәскәү (О.Сакмаров, «Зерна» төркеме), Әлмәт (В.Еремеев), Казан (Р.Вәлиев, «Irish Whisky» ансамбле), АКШ (М.Пятигорский, К.Уобич, Д.Боллер) һәм башка шәһәрләрнең танылган музыкантлары. Фестивальнең төп сәнгати берәмлеге - Казанның «La Primavera» оркестры һәм маэстро Рөстәм Абязов.
12.12.12 - 21.12.12 сихри саннары арасында үтәчәк фестиваль 25 декабрьдә Татар дәүләт филармониясендә Яңа елга багышланган бал белән тәмамланачак.