Башкортстан фильмы, чикләнгән прокатта иң күп касса җыеп, беренче тапкыр премия алды

Казан, 7 февраль, “Татар-информ”, Рузилә Мөхәммәтова). Уфада төшерелгән “Из Уфы с любовью” фильмы “Блокбастер” профессиональ премиясенә ия булды. Бу хакта әлеге фильмның режиссеры Айнур Аскаров хәбәр итә.

Кичә, 6 февральдә, кино бизнесында 2017 ел нәтиҗәләре буенча “Блокбастер” премиясен тапшырдылар. Лауреатларны сайлауның төп күрсәткече – фильмның коммерция уңышы. Призлар 13 номинация буенча бирелде.

Айнур Аскаровның фильмы “Чикләнгән прокатта иң зур касса җыйган фильм” номинациясендә җиңеп чыкты. “Моңарчы бу номинацияне Европа фильмнары ала иде. Россия фильмы беренче тапкыр бу номинация буенча лауреат булды. Фильмның регионда төшерелгән булуына да игътибар итәргә кирәк”, - ди режиссер.

Айнур Аскаровның AskarFilm студиясендә төшерелгән фильмы прокатта 5 292 541 сум керем алган.

“Из Уфы с любовью” фильмы Башкортстан Хөкүмәте грантына төшерелгән иде.

Ул берничә тапкыр Казанда да күрсәтелде.

татар-информ