Башкортстан милли оркестры - Казанда!

Башкортстан республикасының милли симфоник оркестры Татарстан буенча гастрольләре кысаларында Казан тамашачысына коллективның 30 еллыгына багышланган беренче концерт программасын тәкъдим итте.

Концертны Татарстан Республикасының мәдәният министры Ирада Әюпова сәламләве ачып җибәрде. «Профессиональ сәнгате булган, классик сәнгатьтә үз эзен калдырган халыкларның киләчәге бар. Безнең арадагы дуслык җепләре нык булыр, үзара хезмәттәшлегебез алга таба да дәвам итәр дип өметләнәм. Оркестр коллективын 30 еллык юбилее белән тәбрик итәм. Рәхим итегез!» – дип кунакларны каршы алды министр.

Алга таба Башкортстан республикасының мәдәният министры рәхмәт сүзләре белән чыгыш ясады. «Татарстан җирлегенә безне һәрвакыт җылы кабул итүе өчен олы рәхмәтемне белдерәм. Башкача булуы мөмкин дә түгел, без тугандаш халыклар: үзара күп хезмәттәшлек итәбез, эстрада артистларыбыз да уртак. Алга таба да бу хезмәттәшлегебезне дәвам итәрбез дип ышанам», – дип белдерде Әминә Шафикова.

Беренче концертта оркестр ике тугандаш республиканың композиторлар Союзы берлеге рәисләре Ләйлә Исмәгыйлева һәм Рәшит Кәлимуллин ярдәме белән әзерләнгән программа кысаларында башкорт һәм татар композиторларының әсәрләрен башкарды. Кичәдә Заһир Исмәгыйлевнең «Салават Юлаев» операсына увертюрасы, Нәҗиб Жиһановның «Нәфисә» увертюрасы, Хөсәен Әхмәтовның «Башкорт лирик сюита»сы, Фәрид Яруллинның «Шүрәле» балетыннан өзекләр, Рәшид Кәлимуллинның «Симфоник биюләр» сюитасы, Рөстәм Сабитовның 6 нчы Симфониясе (дөньякүләм премьера!) һ.б. тамашачылар тарафыннан яратылып өлгергән әсәрләр яңгырады.

Бүген коллектив Казан тамашачысына икенче концерт программасын тәкъдим итәчәк.