«Без бик матур пар булган булыр идек...»

«Илһам абый мине җырчы буларак та, кеше буларак та, хәтта хатын-кыз буларак та яратты. Аның миңа карата бик өмете бар иде. Мин аңа «Илһам абый, мин яшь бит, син ‒ карт», ‒ дидем. Илһам абый үпкәли торган кеше түгел иде. Безнең арада бу турыда сөйләшү дә булды. Менә хәзерге вакытта, инде Илһам абый киткәннән соң, йөрәгемдә ниндидер үкенү бар. Илһам абыйның шул сүзләрен кабул итмәгәнгә үкенү... Ул миңа тәкъдим ясаган иде, бу хакта белүчеләр дә булды. Ләкин мин аны кире кактым, чөнки ул вакытта бик яшь идем һәм инде яраткан кешемне очраткан идем. Ә без бит бик матур пар булган булыр идек ‒ ике җырчы!» ‒ дип күңелендә озак яшереп йөрткән серен сөйләде Татарстанның һәм Башкортстанның халык артисты Хәмдүнә Тимергалиева 2020 елның гыйнвар аенда дөнья күргән «Әй, язмыш, язмыш» тапшыруында.