Казанда А.Гыйләҗев әсәрләре буенча куелган спектакльләр атналыгы узачак

Бүген 5-11 ноябрь көннәрендә Казанда узачак татар прозаигы һәм драматургы Аяз Гыйләҗев әсәрләре буенча куелган спектакльләр декадасына багышланган матбугат конференциясе узды. Конференциядә драматургның тормыш иптәше Нәкыя Гыйләҗева, улы – драматург Мансур Гыйләҗев, тәнкыйтьче, КФУ доценты Миләүшә Хабетдинова һәм Г.Камал исемендәге Татар дәүләт Академия театрының әдәби бүлек мөдире Нияз Игъламов катнашты. Килгән журналистларга алар Аяз Гыйләҗевның тууына 90 ел тулуга багышланып уздырылган чаралар хакында сөйләделәр.

Камал театрында узачак Аяз Гыйләҗев атналыгында Хакасс милли театры һәм Әлмәт, Әтнә, Казан, Яр Чаллы шәһәрләреннән татар театрлары катнаша.

Спектакльләр Г.Камал исемендәге Татар дәүләт Академия театрының Зур һәм Кече сәхнәләрендә, шулай ук К.Тинчурин исемендәге драма һәм комедия театрында күрсәтеләчәк.

Мәкалә һәм фото авторы: А.Габдуллина