КЕЧЕ ШӘҺӘРЛӘРГӘ – ЗУР МУЗЫКА

15 май көнне Н. Җиһанов исемендәге Казан дәүләт консерваториясендә мәдәният һәм музыкаль белем бирү өлкәсендәге «Кече шәһәрләргә – зур музыка» дип исемләнгән I масштаблы проект кысаларында матбугат конференциясе һәм йомгаклау концерты узды.

«Кече шәһәрләргә – зур музыка» проекты «Сәнгать күпере» фонды һәм Казан консерваториясе тарафыннан РФ Президентының мәдәни инициативалар фонды ярдәме белән гамәлгә ашырыла.

Пресс-конференциядә Казан консерваториясе ректоры Вадим Дулат-Алеев, «Сәнгать күпере» мәдәният өлкәсендәге проектларга ярдәм күрсәтү Фонды президенты Виктор Ямпольский, Казан консерваториясенең сәнгать эшчәнлеге һәм җәмгыять белән элемтә буенча проректоры Елена Хәкимова катнашты.

Проектның максаты – Татарстанның кече шәһәрләрен академик сәнгатькә якынайту, шулай ук балалар һәм яшүсмерләрне классик музыка сәнгате белән таныштыру. Проект дәвамында Казан консерваториясе студентлары һәм укытучылары республикабызның төрле шәһәрләрендә концертлар һәм укыту программалары белән кунакта булдылар.

«Проектның төрле шәһәрләрне һәм регионнарны берләштерүе бик әһәмиятле. Ул башлангыч буынны, югары музыкаль белем бирү юнәлешен һәм башкалаларда эшләп килүче профессиональ сәнгать коллективлары иҗатын берләштерә. Бу безнең дәүләтебез канаты астындагы балалар музыка мәктәпләре укытучыларының казанышы булып торган милли музыка сәнгатебез. Проектны алга таба да шушы ук күтәренке рухта дәвам итәрбез, дип өметләнәм», – дип искәртте Вадим Дулат-Алеев.

I этап дәвамында Татарстанның Буа, Яшел Үзән, Лаеш, Мамадыш, Чистай кебек шәһәрләрендә концертлар оештырылды. Татарстанның 10 шәһәрендә узган чараларда консерваториядән 32 укытучы, 32 студент, музыка мәктәпләреннән 233 укучы һәм мастер-классларда катнашучы, тыңлаучы буларак 1904 кеше катнашты. Проект барышында 44 мастер-класс, 10 концерт һәм 5 аралашу-лекция үткәрелде.

«Кече шәһәрләргә – зур музыка» проекты – файдалы һәм кызыклы хезмәт күрсәтү мисалы. Виктор Исаакович җитәкчелегендәге мәдәниятне саклау Фонды, «Сәнгать күпере» фонды, музыкаль белем бирү вузлары, музыка мәктәпләре һәм кече шәһәрләрнең сәнгать мәктәпләре әлеге проект кысаларында академик музыка сәнгатен халыкка якынрак һәм аңлаешлырак итү максаты белән берләшкән», – дип ассызыклады үз чыгышында Елена Хәкимова.

«Сәнгать күпере» мәдәният өлкәсендәге проектларга ярдәм күрсәтү Фонды президенты Виктор Ямпольский алга таба бу проектның бернинди тышкы шартларга бәйле булмаган, табигый эшләп килүче мөстәкыйль системага әверелүен теләве турында белдерде.

Көн ахырында Казан консерваториясенең Кече залында «Кече шәһәрләргә – зур музыка» проектында катнашкан шәһәрләрнең сәнгать һәм музыка мәктәпләре укучылары катнашында йомгаклау концерты узды.

Автор - Алинә Раджабова.