Пермьдә беренче татар кафесы ачылды

(Казан, 15 февраль, “Татар-информ”, Алмаз Шиһабетдинов). 10 февраль көнне Пермь шәһәрендә “Салаваты” исемле беренче татар кафесы ачылган. Бу хакта “Татар-информ” хәбәрчесенә кафеның җитәкчесе Альфиса Нурисламова хәбәр итте.

Альфиса Нурисламова сүзләренчә, Пермьдә татарларның җыелышып, бәйрәмнәр уздырырга урыны булмаган. Җитәкче кафеда төрле милли чаралар уздырылачагын әйтте.

“Бездә милләтне үстерү һәм саклауга багышланган чаралар узачак. Без бергә җыелган очракта да рус кафеларында утыра идек. Туган көннәрне, юбилейларны үткәрергә үз урыныбыз булса яхшырак булыр дип уйладык”, - дип сөйләде ул.

Менюда Европа кухнясы һәм татар ашлары урын алган.

“Салаваты” кафесының исеме Альфиса Нурисламованың туган авылы хөрмәтенә бирелгән.

татар-информ

Фото: Альфиса Нурисламова