«Ватаным Татарстан»ның баш мөхәррире алышына

Бүген интернеттагы мәгълүмат чараларында «Ватаным Татарстан»ның баш мөхәррире алышынуы турында мәгълүмат таралды. Моңа кадәр 15 ел буе баш мөхәррир вазыйфасында танылган журналист, мөхәррир, укытучы, эшенең югары остасы Миңназыйм Сәфәров булды.

«Ватаным»га килер алдыннан ул «Татарстан яшьләре» газетасында озак еллар эшләү дәверендә ул аналитик фикер йөртә торган, йөгерек телле, кыю журналист булып танылды. Журналистлык эшчәнлеге белән беррәттән Миңназыйм Мәүлит улы КФУда булачак журналистлар да тәрбияли. Ул күп еллар эшләгән урыныннан китүе сәбәпләрен яктыртмый.

Татарстанның төп дәүләт газетының баш мөхәррире Гөлнара Сабирова булачак дигән имеш-мимешләр дә йөри. Бүгенге көндә Гөлнара Ильяс кызы «Шәһри Казан» газеты һәм «Сөембикә» журналы баш мөхәррире булып эшли. Эш дәверендә ханым үзен актив, эзләнүчән, эшчән җитәкче итеп күрсәтә белде.

Автор: Эльвира Сабирова

Фото: tatar-inform.tatar