Яр Чаллы театры яңа белгечләр кабул итте

Яр Чаллы татар дәүләт драма театры гаиләсе ишәйгән. Сезон ачылышы алдыннан театр яңа белгечләр кабул иткән.

Баш рәссам итеп ​Сергей Скомороховның укучысы ​Ләйсән Хөсәенова, ә музыкаль бүлек мөдире буларак Уфа композиторы Эмиль Әмиров билгеләнде. «Моңарчы ул театрда «Кыш бабайга бүләк» балалар спектаклендә (2017) һәм «Зәңгәр томан артында» лирик комедиясендә эшләде (2018)», – дип белдерде театр.

Труппага Казан театр училищесында Зөлфәт Закиров һәм Резедә Гарипова курсын тәмамлаган 3 шәкерт кабул ителде: Фирдүс Сафин, Физәлия Габидуллина һәм Винер Фәйзуллин. Моннан тыш Туймазы татар дәүләт драма театрында иҗат иткән Марсель Мөсәвировны  шулай ук Яр Чаллы театры сәхнәсендә күрә алачакбыз.