Җырчы Нюша Россия Президенты сайлауларында үз тавышын Әлмәттә бирде

(Әлмәт, 18 март, “Татар-информ”, “Хезмәт даны”, Эльмира Габидуллина). Россия эстрадасы артисты, җырчы Нюша бүген Татарстанның Әлмәт шәһәрендә Россия Президенты сайлауларында катнашты. Ул Әлмәткә концерт программасы белән килгән иде. Нюша ире Игорь Сивов белән “Нефтьче” Мәдәният йортында тавыш бирде.

“Ил өчен истәлекле вакыйгада катнаша алуыма шатмын. Россия өчен мөһим чаралардан читтә каласым килми. Барыгызны да гражданлык бурычыгызны үтәргә чакырам”, - диде җырчы.

Әлмәт яшьләре танылган җырчыны уратып алды. Селфи, чәчәк бәйләмнәре һәм автографлар әлмәтлеләрнең кумирлары белән очрашуын бизәде.

Аннары Мәдәният йортының икенче катында матбугат очрашуы узды. Әлмәт муниципаль районы башлыгы Айрат Хәйруллин танылган җырчыга шәһәр яшьләренең ничек яшәве, иҗат белән шөгыльләнү өчен нинди шартлар булдырылуы турында сөйләде. Балалар, үсмерләр, иҗади яшьләр, шулай ук массакүләм мәгълүмат чаралары вәкилләре Нюшага кызыксынулары, сәясәткә мөнәсәбәте, иҗади планнары турында сораулар бирде.

татар-информ

Фото: "Знамя труда"