“Ана күзләре”

“Әкият” Татар дәүләт курчак театры артисты Альбина Шагалиева: 

.“Ана күзләре” спектаклендәге Саяко роленә килү тарихы минем өчен  бик әһәмиятле вакыйга. Рольләр бүленгәндә мин бу образга өченче составка  билгеләнгән идем. Ләкин спектакль өстендә эшләгән дәвердә көтелмәгән хәлләр килеп чыкты. Премьерага кадәр берникадәр вакыт калгач, беренче составта уйнаган актриса белән бәхетсезлек килеп чыкты, ул аягын авырттырган. Бер атнадан соң икенче составта уйнаган актриса да авырый башлады һәм аңа хастаханәгә ятарга туры килде. Менә шул вакытта төп рольне миңа тапшырдылар. Язмыш уйнавымы, күкләр тарафыннан төшкән бүләкме?... Белмим. Сәхнәдәшләрем: “Бәхетеңә тигән – көмешең!” – дип шаяралар. Бу образ минем өчен бик кадерле. Ул күп кенә яңа мөмкинлекләремне ачарга ярдәм итте. Катлаулы төп рольне башкаруны яшь  актрисага ышанып тапшырганы өчен, театрыбызның баш режиссеры Илдус Зиннуровка бик рәхмәтлемен.

Спектакльнең нигезендә “Ана белән бала мәңге бер” дигән фикер ята. Сюжетта Тау иясе тарафыннан Еланга әверелдерелгән Ана үзенең башта бер күзен, аннары, вакыйгалар барышында, нәни улы белән ялгыз калган иренә, баланы тәрбияләргә  булышу өчен, икенче күзен дә бирә. Спектакльдә –  Ана мәхәббәте, тормышның һәр минутында зур түземлек белән аналык вазифаларын башкару, бала мәхәббәте, иргә тугрылык темалары күтәрелә.

“Ана күзләре” спектакле мәктәп балалары өчен генә түгел, ә өлкән тамашачыларга да бик кызыклы дип уйлым. Бу спектаклебезгә, нәни тамашачылар белән беррәттән,яшьләрне, студентларны һәм олыларны да чакырам. “Ана күзләре” спектакленә уңышлар, рәхмәтле тамашачы һәм озын гомер теләп калам.