«Нәүрүз» фестиваль-форумы якынлаша

Бүген Камал театрының кече сәхнәсендә 18-23 июньдә булачак «Нәүрүз» төрки халыклар театр фестивале карамагындагы II театраль белем бирү форумына кагылышлы пресс-конференция узды. Журналистларның сорауларына «Нәүрүз» фестиваленең сәнгать җитәкчесе Фәрит Бикчәнтәев, фестиваль-форумның башкарма директоры Илфир Якупов, Камал театрының әдәби бүлек мөдире Нияз Игъламов һәм фестиваль-форумда сәхнә хәрәкәте буенча педагог, Казан театр училищесы укытучысы Рөстәм Фәтхуллин җавап бирде.

Дан казанган Литва театрының Казанга килүе журналистларның аеруча игътибарын җәлеп итте.

«Мено Фортас» 1998 елда режиссер Эймунтас Някрошюс тарафыннан ачыла. Някрошюсның үзенчәлекле иҗаты күп төрле бүләкләргә ия. Алар арасында Европа театрлары союзы премиясе, Таорминда (Италия) урнашкан Театр комитетының «Европаның яңа театр чынбарлыгы» премиясе, Россиянең «Алтын битлек» милли премиясе һ.б.

Литва театрының безгә төрки фестиваль кысаларында килүе очраклы түгел. Някрошюс гомумкешелек проблемаларын күтәргән классик әсәрләрне генә сәхнәгә куйса да, рухы белән ул милли режиссер. Фәрит Бикчәнтәев аны шаяртып авыл малае дип тә атады, чөнки тумышы белән Някрошюс Литваның кечкенә генә Жемайтия җирлегеннән.

Вильнюс театрының Казанга килүе хакында сөйләшүләр ике елга якын барган. Ниһаять, быел Камал театры тамашачысы Някрошюс куелышында «Идиот» (Ф.Достоевский) спектаклен карый алачак. Форумның «Театр тәнкыйте» секциясенә язылучылар исә спектакль турында фикер алышуда да катнашачак.

Форумга Эймунтас Някрошюс үзе дә килер дип көтелә. Камал театры җитәкчелеге атаклы режиссер белән киләчәктәге хезмәтәшлек турында сөйләшүләр алып барачак. Академия театры милли театр буларак мондый хезмәттәшлеккә өмет итә ала. Бәлки Камал театры тамашачысы киләчәктә М.Галәүнең «Мөһәҗирләр»ен Някрошюс куелышында карый алыр, дигән фикерен белдерде Фәрит Бикчәнтәев.