Традицияләрне яңартып

Кичәдә Әтнә театры белән Камал театры арасында озак еллар дәвам иткән традиция – Халыкара театр көнендә кунакка йөрешү йоласы яңартылды. Моннан 40 ел элек режиссер Марсель Сәлимҗанов бар иткән бу күркәм гадәт соңгы дистә елда тукталып торган иде.

Быелгы бәйрәмдә Камал театрының олпат артистлары белән янәшә ике театрның да яшьләре чыгыш ясады. Мәңгелеккә арабыздан киткән театр әһелләренең исемнәре тагын бер кат күңелгә уелды. Тамашачы, тын да алмый, сәхнәдән ишетелгән һәр сүзне, җөмләне, һәр көйне, җырны йөрәгенә сеңдереп утырды. Бәйрәмдә Татарстан мәдәният министрлыгы вәкилләре, башкала журналистлары катнашты.