17 декабрь «Сәйдәш» мәдәният үзәгендә «Әйдә, ШаяРТ!» татар КВН лигасы финалы узды!

2024 ел сезоны ябылышында барлыгы 5 команда катнашты. «Нәмәкәй» (Актаныш), «Сабалета» (Саба), «Изи» (Мамадыш), «Дилүс улы» (Казан), «Керәшеннәр» (Казан) командалары җиңү өчен көрәште.

Финал уенын Татарстан Республикасы Рәисе каршындагы Татар телен саклау һәм үстерү мәсьәләләре комиссиясе әгъзасы, Татарстан Республикасы Дәүләт Советының Бюджет, салымнар һәм финанс комитеты рәисе урынбасары Камил Ногаев, Татарстан Республикасы яшьләр эшләре министры Ринат Садыйков тамаша кылды.

Уенчыларны Татарстанның халык артисты Җәвит Шакиров, «ТНВ» телеканалының генераль директоры Илшат Әминов, «Мунча ташы» татар эстрадасы театрының сәнгать җитәкчесе, Татарстанның халык артисты Гамил Әсхәдулла, «Әйдә, ШаяРТ!» татар КВН лигасы җитәкчесе Рамил Агдеев, «ТНВ» телеканалының алып баручысы Айваз Садыйров бәяләде.

«Яшьләр арасында безнең төп бурычыбыз – татар телен һәм гореф-гадәтләребезне саклау. Татар КВНы шул юнәлештә эшли һәм эшләячәк», – дип искәртте Ринат Садыйков.

Шунысын да әйтик, «Әйдә, ШаяРТ!» проекты Татарстан Республикасы Рәисе каршындагы Татар телен саклау һәм үстерү мәсьәләләре комиссиясе ярдәме белән үткәрелә.

«Безнең илдә КВН 60 нчы елларда башланып китте, ул вакытта аны шаккатып карый идек. Киләсе елга безнең татар КВНына да 30 ел тула. Шушы проектны оештыручыларга зур рәхмәт! Без татар КВНы булуы белән горурланабыз», – диде Камил Ногаев.

«Бүген, чыннан да, тарих язылды. Сәхнәдә масштаблы күренешләр дә булды: моңа кадәр чыкмаган машиналар да күренде. Сәхнәгә чыккан артист, һәр уенчы, шушы уенга өлеш керткән һәр кеше татар теле, татар милләтенә дә өлеш кертә. Чөнки бездә юмор дар: без көләбез, без үзебездән көләбез һәм шуның белән бәхетле дә», – дип ассызыклады Айваз Садыйров.

Абсолют җиңүче исеменә «Дилүс улы» (Казан) командасы лаек булды. Ул 200 мең сум акча отты. Былтыр Гран-Прига Актаныш районының «Нәмәкәй» командасы лаек булган иде.