2018 елда Казанда 2 мәктәп һәм 19 балалар бакчасы капиталь төзекләндереләчәк

2017 елда Казанда 13 мәктәп һәм 9 балалар бакчасы капиталь төзекләндерелде. Тотылган акчаларның суммасы 668 млн сум тәшкил итә, шуларның 42 млн сумы – шәһәр бюджетыннан, дип хәбәр итте бүген Татарстан башкаласы Мэры Илсур Метшинга Мәгариф идарәсе җитәкчесе вазыйфаларын башкаручы Илнар Һидиятов.

Ул хәбәр иткәнчә, 2018 елда Казанда 2 мәктәп һәм 19 балалар бакчасы 596 млн сумга капиталь төзекләндереләчәк.

Моннан кала, шәһәрнең мәгариф учреждениеләрендә Россия Хакимияте тарафыннан кертелгән “Заманча цифрлы мәгариф мохите” өстенлекле проектын гамәлгә ашыру өчен нигез салынган.

“Казаның барлык мәктәпләрен дә “цифрлы” дияргә мөмкин. Мәктәпләрдә биш укучыга бер компьютер туры килә, кабинетларның 84 проценты интерактив һәм мультимедияле җайланмалар белән җиһазландырылган”, - диде чыгыш ясаучы.

Моннан кала, шәһәр мәктәпләре ведомствоара электрон документлар әйләнеше системасына тоташтырылган. Бу эшне бердәм мәгълүмати яссылыкта башкарырга ярдәм итә. “Видеоконференцэлемтә” шәһәр проекты да әһәмияткә ия. Узган елда мәктәпләр арасында әлеге режимда 43 уртак чара үткәрелде, диде И.Һидиятов.

2017 елда кертелгән яңалыкларның берсе булып идарә итүнең авария-диспетчерлык хезмәтен кертү тора. Хисап периодында хезмәт тарафыннан “Ачык Казан” системасы аша килгән 4,5 меңнән артык гариза каралган.

Аерым алганда, узган елда иске металл контейнерларны евро-контейнерларга алыштыру проекты гамәлгә ашырылган, авария хәлендәге агачлар киселгән, 14 велопарк оештырылган. Моннан кала, барлык учреждениеләр җитәрлек күләмдә ком-тоз катнашмасы белән тәэмин ителгән. “Әлеге сорауларны хәл итү 2018 елда да дәвам итәчәк”, - дип ышандырды И.Һидиятов.

www.kzn.ru