23 февральдә казанлылар иске оекбашларын яңага алыштыра алачак

(Казан, 22 февраль, «Татар-информ», Наталья Рыбакова). 23 февральдә казанлылар иске оекбашларын яңага алыштыра алачак. Бу көнне шәһәрдә иске кием-салым һәм капкачлар җыю буенча #ЭкологичныйЯгуар дигән акция уза. Бу хакта «Татар-информ» агентлыгына «Инициативалар картасы» проектының җәмәгатьчелек белән элемтә юнәлеше җитәкчесе Айдар Зиннәтуллин хәбәр итте.

«Экология акциясе кысаларында - эшкәртү өчен кием-салым, урын-җир әйберләре һәм пластмассадан эшләнгән капкачлар җыячакбыз. Чара Казанның җиде районында узачак. Өч районда өч стационар пункт эшләячәк. Моннан тыш, районнар буенча йөреп, аларның һәркайсында бер сәгать дәвамында әйберләр җыячакбыз», - диде ул.

Экология акциясендә катнашучылар көтелмәгән бүләкләр дә алачак. Мисал өчен, бу көнне алар иске оекбашларын яңага алыштыра ала. 3 килограммнан артык әйбер алып килүчеләргә - кинога билет, ә балаларга тәм-томнар бүләк ителәчәк.

#ЭкологичныйЯгуар акциясе 23 февральдә түбәндәге адреслар буенча уза:
10.00-11.00 Киров районы, Петров паркы
11.15-12.15 Мәскәү районы, Урицкий паркы 
12.30-13.30 Авиатөзелеш районы, Ленин исемендәге мәдәният-ял комплексы янындагы Крылья Советов паркы 
13.45-14.15 Яңа Савин районы, «Марьино озеро» экопаркы 
14.30-15.30 Вахитов районы, Дзержинский урамы буенча Черек күл паркы янында 
15.45-16.15 Совет районы, Патрис Лумумба урамы янындагы Хәрби комиссариат бинасы (Аэропорт урамы, 1) тирәсендә 
16.30-17.30 Азино микрорайоны, Горки-Әмәт урманы парковкасы 
17.45-18.15 Идел буе районы, Җиңү проспекты метро станциясе янындагы Дан скверы  

татар-информ

Фото: pixabay.com