Авыл хуҗалыгы министры кимчелекләрдә һава торышы һәм базар шартларын гаепләмәскә куша

(Казан, 14 февраль, “Татар-информ”, Чулпан Шакирова). Татарстан авыл хуҗалыгы министры ел йомгакларына багышланган коллегия утырышында һава торышы һәм базар шартларын гаепләмәскә кирәклеген искәртте.

“Үзебезнең җитешсезлекләрдә без һава торышын яки базарны гаеплибез. Әмма идеаль базар шартлары һәм һава торышы булганы да юк. Без алар җаена яраклашырга, алар кагыйдәсе белән эшләргә тиеш. Киров, Удмуртия, Оренбургка карагыз! Бездәгедән дә авыррак шартларда эшлиләр. Эшлиләр бит!” – диде министр.

Утырышта катнашучы коллегаларына мөрәҗәгать итеп ул: “Безнең барыбызның да бер генә хокукы бар – республиканың агросәнәгать комплексын тагын да көчлерәк итү”, – диде.

Искәртеп үтик, бүген Татарстан авыл хуҗалыгы министрлыгының киңәйтелгән коллегия утырышы узды. Аның эшендә Татарстан Президенты Рөстәм Миңнеханов һәм Дәүләт киңәшчесе Минтимер Шәймиев катнашты.  

татар-информ

Фото: Салават Камалетдинов