Иртәгә Казанда Муса Җәлилне искә алу чаралары узачак

Иртәгә бөек шагыйрь Муса Җәлилнең тууына 112 ел тула. Шул уңайдан Казанда аны искә алу чаралары узачак.

11.30да шагыйрьнең 1 май мәйданында урнашкан һәйкәленә чәчәкләр салу узачак. Ә 12.00дә Татарстан Республикасы Милли музеенда Муса Җәлилнең Моабит дәфтәрләренең төп нөсхәсен күрергә була. Быел аны ТР Язучылар берлеге рәисе урынбасары, М.Җәлил исемендәге Республика премиясе һәм XII Халыкара төрек шигърияте фестивале лауреаты, шагыйрь Рәмис Аймәт тәкъдим итә.

Көн дәвамында музейда «Батыр үлә, үлмәс ат алып…» күргәзмәсе эшләячәк, бөтен Россия буенча М.Җәлилгә куелган һәйкәлләргә багышланган «Җәлил исемен мәңгеләштерү» презентациясе узачак. Музейга килүчеләрнең шагыйрьнең төрле елларда басылган шигырьләр китапларын күрү мөмкинлеге булачак.

Шулай ук Татарстан халыкларының Яшьләр ассамблеясе тарафыннан оештырылган Муса Җәлил шигырьләрен иң матур уку бәйгесендә җиңүчеләргә грамоталар тапшырылачак. Искәртеп узабыз: бөек шагыйрьнең шигырьләрен уку конкурсы интернетта башланган иде. Анда катнашучыларны #джалиль2018 #джалиль112 #мант хэштеглары буенча бәяләргә мөмкин.

mincult.tatarstan.ru