Казанның балалар поликлиникаларында 600 табиб җитми

(Казан, 2 июль, «Татар-информ»). Казанның балалар поликлиникаларында 600 табиб җитми. Шәһәр Башкарма комитетының Сәламәтлек саклау идарәсе башлыгы Илнур Хәлфиев башкала мэриясендә узган эшлекле дүшәмбе киңәшмәсендә шул хакта хәбәр итте.

«Бездә табибларга ихтыяҗ шактый зур. Әйтик, балалар поликлиникаларында гына да 600 медицина хезмәткәре кирәк», - дип искәртте Илнур Хәлфиев.

Узган елда шәһәр хастаханәләренең табиблар белән тәэмин ителеше ике процентка артып, 78,9 процент тәшкил иткән. Бу – соңгы биш елдагы иң зур күрсәткеч.

«Соңгы бер елда Казан дәүләт медицина университетын тәмамлаган 161 яшь белгеч хастаханәләргә эшкә урнашты, табибларның кадрлар составы яшәрә бара. Бер ел эчендә пенсия яшендәге табибларның саны 10 процентка кимеде», - диде идарә җитәкчесе.

татар-информ

Фото: архив/Расих Фасхутдинов