«Халәтемне аңлатып бетерә алмыйм...»

7 ай элек өченче тапкыр әти-әни булган Азат һәм Алсу Фазлыевларга социаль челтәрләрдә язылучылары еш кына канәгатьсезлек белдерәләр. Янәсе «Синдә генә инде бала!», «Синдә генә инде кыз!».

Бу уңайдан Алсу тамашачыларына күңелендә булган хисләрен аңлатып, Инстаграм сәхифәсендә җавап язып калдырган.

«Мин генә аңлатып бетерә алмыйммы халәтемне, яисә кеше шулай бер-берсенә битарафмы?! Ул бит минем бик озак көткән кызым. Картайган көнебездә безгә терәк булырдай кызыбыз.

Начар комментарий язар алдыннан башта минем урынга үз балагызны куеп карагыз. Чөнки мин дә башта сезнең урынга сезнең яшьтә булган әниемне куеп карыйм... Ул кеше баласына алай язмас иде», – дип үз сүзләрен матур шигырь юллары белән дә раслап куйган артист.

Авыр сүзләр әйтмик бер-беребезгә,

Начар сүзне күңел күтәрмәс.

Бер сәбәпсез кеше рәнҗеткәннәр

Тыныч кына гомер итәлмәс.

Нахак әйткән сүзнең яралары

Мәңгелеккә кала йөрәктә.

Тешне кысып, түзеп кала белик

Авыр сүз әйтергә кирәктә.

Беркөн шулай синең үзеңә дә

Кемдер әйтми калыр авыр сүз.

Ачуларың яшерә бел эчкә,

Усал сүзләр әйтмә, дәшмә, түз.

Сүзебезне уйлап әйтик, дуслар,

Яраламыйк кеше күңелен.

Исебездә тотыйк беркемнең дә

Бу җирдә мәңгелек түгелен.