Хәнияне онытырлык түгел

«Барыр юлларына яфрак сибелгән, китмәс инде, китмәс күңелдән...» – шулай дип җырлый Хәния Фәрхи. Әйтерсең лә үзенә, үзенең үлемсезлегенә атап җырлый. Инде юклыгына өч ел үтсә дә, онытылмый шул, яши халык күңелендә. Минем үземнең дә иң яраткан җырчыларымның берсе иде ул. Җыры белән генә түгел, сәхнәдә үз-үзен тотышы, киенүе, гадилеге белән дә халык күңеленә кереп калды. Зәвыклы җырчы иде ул.  

Тормышымдагы авыр чакларымда аннан көч ала идем. Шулкадәр авырлыклар алдында баш имичә алга барып, халык мәхәббәтен яуларлык җырчы булыр өчен, ай-һай, күп көч кирәк булгандыр аңа. Йөрәк түзә-түзә дә, берзаман туктап кала шул.  

Кайбер җырчыларга карыйсыз да, ник чыккан инде бу сәхнәгә дип уйлап утырасың. Кырыенда бөтерелеп биеп йөрүчеләргә карап кына бераз хозурлык аласың. Ә Хәния андый түгел иде. Ул җырда яшәде. Аның һәрбер җыры үзе белән алып кереп китеп хисләндерә, моң дөньясында гиздерә иде. Хәниянең көчле рухлы, тырыш булуы, үз-үзенә ышанучанлыгы, тормыш авырлыкларыннан куркып калмый аларны җиңеп чыгуы сокландырды.  

Хәния халык күңелендә яши һәм яшәячәк. Аның җырлары бер көнлек түгел, ә мәңгелек! Якыннарына Ходай сабырлык бирсен.  

Нурия ШӘРИФУЛЛИНА. Мөслим районы, Иске Чакмак авылы 

Татарстан яшьләре