Лаешлылар Мәскәү өлкәсендә Сабан туе үткәрде

Сергеев- Посад шәһәренең “Скитские пруды” паркында лаешлылар милли ишегалды оештырган.

Лаешлылар Мәскәү өлкәсендә Сабан туе үткәрде. Икенче ел район делегациясе Мәскәү янындагы өлкә бәйрәмендә катнаша. Бу турыда район газетасы хәбәр итте.

Мәскәү төбәгендә Сабан туе Сергеев- Посад шәһәренең “Скитские пруды” паркында булган. Биредә лаешлылар милли ишегалды оештырган.

Бәйрәмдә Лаеш район башлыгы Михаил Афанасьев, Сергеев-Посад районы башлыгы урынбасары Дмитрий Акулов, РФда ТРның вәкаләтле вәкиленең беренче урынбасары Илдар Мөхәммәдьяров, Мәскәү өлкәсе төбәк татар милли-мәдәният автономиясе рәисе Фәрит Мөхтәсәров катнашкан.

"Кунаклар Лаеш җитештерүчеләре продукциясен һәм халык һөнәрчеләре әйберләрен карадылар, шулай ук уеннарда һәм ярышларда катнаштылар", диелгән әлеге хәбәрдә.

Төп сәхнәдә үзешчән сәнгать артистлары һәм “Сәйдәш” бию ансамбле чыгыш ясаган.

• Киләсе елда Мәскәү өлкә Сабан туе Щелковода үтәчәк. 

Фото: laishevskyi.ru

Татар-Информ